Tema: Ong tumagak it ongopongoretan - I vaza do kotonusan dit
ongoboros dit ongobansa


Cerama di Professor D. Wunderlich Duesseldorf sid Radio SWR 2
Stuttgart




Piro-ka ongoboros di kakali pinakai dot ulun? Varo-ka 50
ko 200 ko saribu-ka? Ong otopot, banal-no varo do onom ribu ot ongoboros sid
sompomogunan, nga murang-kurang-nopo ong biano, tu mad tumanusi. Kiroon-ku,
hiza di mononcerama-oku diti, kakali varo iso?t ulun mumbongut di boros di
kodung matai it ulun dino, iri-ogi tumanus i boros dino, tu it ulun dino it iso
ot ulun di kakali elo di boros dino. Kodung apataii, nohino-no vagu i kogumuo
dit ongoboros. Manjadi ong manarang di hal dit ongoboros, amu oruhai do
monodiri dot ombo i boros dit osodiri om i bai boros daerah, iadko i pitonidan
do Rungus om Nulu ko Tobilung om Kimaragang. Ikid boros varo ongovaza di
sumuhut di koubasan mamalang om mumbongut isuhut di daerah dau, nga kakali
iseso o boros. Vokon-no mad osodiri i boros, tu tanid i vaza monurat. Iadko i
gulu diri, i kakali i British om i Belanda mangahatul di vaza monurat di Bahasa
Malayu om Bahasa Indonesia.
Hiza di toun 1975 notontuan-no dot ino duvo boros dino, nga iso-no.



Ong sid ensanan i Eropa, om Asia
barat, varo bai 250 ot ongoboros dot i kogumuo dot ulun mamakai dit ongoboros
dino, nga 800 Juta. Ino dino jinumadi antad sid gama dit ongobansa miuumpug om
monodiri dit a-ko piro ongopomogunan ko porinta om i hoturan-po do Silam. Topot
ong sid Papua New Guinea
varo-no 850 ongoboros dot i kogumuo dot ulun sid puru dino, bai 3,5 Jutai. I
harati, ikid boros dino, varo bai ongoapat ribu ot ulun di mamakai di dau om
dau do boros. Pengkaa dino sid Indonesia,
Nigeria, India, Cameroon om Mexiko nga ikid
pomogunan dino varo ongo250 sampai 650 ongoboros sid ongopomogunan dino. Kagi
koubasan dot ulun sino dino, a-m ilo-miloipat-ipat it ulun elo do sampai tolu
ko apat ot ongoboros, gima kodung minsamung dit ongobansa vokon sid pasal,
kopiharati om kopiboros it ongoulun sid ulun di tanid o boros dau, supaya
mihaharati-nobo. Sid Asia om sid Afrika varo ikid 2000 ot ongoboros, ko sid
Amerika, nga varoi 900 it ongoboros dot ulun.



Na varo ongoboros di bai okudik ot ulun mamakai om varo-po
do asapou it ulun di mamakai di boros dino. Dot it ongoboros di bai okudik ot
ulun mamakai, inono i kogumuai. Ulun di mintoron sid ongoburul ko sid himbaan
ko sid belantara, vokon-no ikid kampong, nga osodiri i boros dau antad sid
boros di kampong sid sombol. Varo umba dot ongoelo dot 90% dit ongoboros sid
sompomogunan, bai ongolimo ribu ot ululn elo di boros dau dino. Na kodung it
ulun di iadino minsomok sid ongobansa vokon ko mamung sid bansa vokon, tigogi,
tumanus i boros dino. I hal dino, retanko tipatai i boros di iadino. Kodung it
anganak amu misisingilo om mamakai di boros di molohing dau, inoi nga sumikul
sid sikul di mamakai di boros vokon, iri-ogi oruhai tumanus i boros di molohing
dioti dino. Iadko sid Australia,
varo-po 250 it ongoboros, topot it anganak sid Australia bei elo-po momoros sid 25
ot ongoboros. I vokon-no, nga tumanus-nopo. Varo kiroon dit ongoelo dot ong
binao, 40% dit ongoboros dino amu-no apakai sid anganak sampai hatus toun antad
biano, bai 600 -po ongoboros nga kakali nokopudi. I harati, 905 dit ongoboros
titanus om tipataii. Minsanko varo ongoulun biano di miim-tiim patandon sid surat dit ongoboros dino,
mad aso tinganan manahan di kotonuso om kapatazo dit ongoboros dino.
Varo-no laid kinapatazan om kinotonusan do boros, iadko i
boros do Masir ko Yahudi om Yunani ko Latin. Ino dino antad di vaza pagavul om
miamung it ongobansa Iadko i Latin, ino boros dino nakagavul sid boros dot
Inggeris om Francis om Italia ko Spaniol om Jerman. Kavi it ongoboros dino
minolos dit ongopongoretan do Latin om minonimban dit ongopongoretan dino
isuhut di dau do hoturan. Kagi varo ongoboros di vagui iadko i Pidgin-Inggeris
sid Papua dit jinumadi antad sid boros dot Inggeris, nga i vaza mumbongut,
isuhut di vaza dit ulun Papua mongitung om mamalangi. Topot kuran-kuran, ong
didino, humino i kogumuo dit ongoboros sid sompomogunan. Nunu-ka i sabap om
nunu-ka i kosungguvo dino, antava kuran-ka o kadapat manahan om sumaap di hal
dino?



Iti-no o sabap di kotonuso dit ongoboros, I Globalisation
- I hal dot sompomogunan sumuhut di bai iso-po hoturan om kobudayaan om kiroon.
Sid saralom do limo nopod toun, asarok it anganak amu mintoron sid molohing,
inoi nga sinumikul sid asrama dot i boros do tudukan sid sikul, nga okonko i
boros dit ama om idi dau. Gam sid Russia,
USA
om Kanada minoniag it ongoulion dot asrama dit anganak do mamakai-po di dau do
boros. Iri-ogi oduruk-no dot it ulun suvai kadapat mongining di dau do boros
sid aki om odu dau dot amu songkuro, ong minatai it aki om i odu, nga atanus-no
i boros dioti dino.



Nunu-ka ot tumagak, ong tumanus it iso i boros? Ong
otopot, ikid anak do ragang-po elo misisingilo dot disai-nopo o boros, isuhut
di tampat di kosukudon dau. Sokoviai i riniba oelo do misisingilo di vaza
mumbongut. Sokoviai it ongoboros varo hal dit isesoi, do kadapat manarang sid
ongopongoretan im i vaza monimban dit ongoboros ombo i najadi om ombo i
jumadi-ogi, i hal do kohorotizan ko konoruvo om kasavato, i hal do kopurimanan
do ginavo om guvas ko vokoni. Ino hal dino banalko tanid mantadko i vaza dit
ongodupot monguni ko mongingud di koruhang dau. Manjadi ong sumimban i
kobuatano do pomogunan ko i keloo dot ulun, iri-ogi i boros mimbulai do
pongoretan di kadapat manarang di hal vagu, antava ong varo hal di mimbulai
antad sid bansa vokon, lobipo oruhai ong oolosi i pongoretan dino sid bansa
vokon. Iadko it Inggeris Spring ko bicycle jumadi do supiring om besikal sid Momogun.



Iso-no o hal banalko atag dot apatong om ohodtol ot
otontuani, ino-no, Banalko amu nokonong ong varo kiroon do suvai oosurat o
boros, iri-ogi i boros dino kiguna ko atagi. Gam it ongoboros dit amu mamakai
do surat,
banalko elo monodiri om manarang dit ongohal. Kodung monurat it ongoulun, mad
malan mongitung om monodiri. Suvai memot sid Kamus om elaan-ogi manarang. Topot
ong i boros laid diri, banalko olundu dit ongopongoretan om it ongovaza
monodiri om mamalang om manalahas dit ongopitonidan om ongopialatan dit
ongohal. Iadko Momogun om Malayu, ong i vaza mamakai di kitarom, ong sid
Malayu, bai iso pongoretan, ino-no potong: potong rumbut om rambut om ubi om
kayu om daging om sayur. Topot ong Momogun monodiri do sampai labaan dot turu
nopod vaza monodiri, isuhut di pakakas om ombo o hal dit otoguvangan do
kitarom. Sabap ino, ong kopiboros i Kina om Momogun do mamakai do bahasa, bai
oribau i vaza miboboros, tu sompi amu elo banal dit ongopongoretan do Bahasa,
lobipo, ong varo dara pongoretan dot aralom. Tu sompi bai okudik o kogumuo dit
ongopongoretan di keloo di Kina om Momogun, ko ulun dot Eropa om Momogun, nga
iadinoi.



I boros dot ulun manarang di ginavo om utok dot ulun om i
kobudayaan om i vaza dau humarati di hal do koposizan om it ongopiniizaan dot
ulun.



Ong bai sid sikul om sid buuk o pisisingilaan do boros,
okonko sid molohing om sid pialatan di bansa dau, bai okudik o pongoretan dit
ulun dino om osikim i gama dit ulun dino manarang dit ongokenginan om kiroon
dau. Varo ulun do politik retanko bai 800 o pongoretan pinakai dau ong
mumbongut iosido sid toguvangon do dewan om it razat.



Manajadi i hal do mopud i boros ko matai, ino-no nga hal
dit ongoulun di manansanganu di boros dino. Ong ioti mamakai di boros dau om
mongontupat dot amu pagavul-po dit ongopongoretan dit ulun vokon, ko molos sid
bansa om boros vokon, iri-ogi mopud i boros dino. Banal-no, ong varo hal dit
a-kopitiim sid boros dau, tu hal vagu ko hal do teknik, ino dino kadapat molos
sid boros vokon, Inggeris ko nunu-nopo. Topot kakali atag do potungkus banal
sid anganak di boros di molohing om aki om odu. Tu i boros, nga kotungkusan dit
amu atag tatakoni ko tonusoni. Iadko sid New Sealand, minsanko i hiza di
nakatalib, it ongoMaori sinumuhut di hoturan do British do mamakai dot Inggeris,
biano-no i molohing miguli misisingilo do dau do boros sompihiza dot it anganak
dioti misisingilo di boros do Maori, ko sid Kanada, varo anganak dit Hualapais,
i retanko Red Indian, nga valu toun sumikul it anganak dot i boros do tudukan,
nga Hualapais, iri-ogi misisingilo-ogi di boros dot Inggeris.
Koduvo, ong varo dara pongitungan dot it ulun elo do bai
iso o boros, banalko amunokonong i pongitungan di iadino. Gam ong duvo, tolu o
boros nokelo it ulun, ino-no i hoturan do vangun dot ulun. Sabap ong sukul
moubas it ulun do kodung tumoguvang dot ulun dot Inggeris, Inggeris o
mumbonguti, om kodung Malayu, nga bahasa ot avalangi, sampai kodung Tobilung,
nga Tobilung o toguvangon dau, sabap it utok dot ulun dino amu obul om amu
malan m,anarang dit ongohal sid tasantanid-tanid o pongoretan om boros.






Kasalaan-nopo, ong sid Momogun om vokon, nokotimpuun it araat o
kotuobasan dot kodung amu andaman di pongoretan sid dau do boros, mamalang sid
Inggeris ko Kina ko vokon, dot indoson, it ulun di mongining, nga kaharati. Sid
hal dino varo-po tudukan dit ongosikul dit amu nokonong, iadko i gulu diri,
hiza di British: it anganak misisingilo do songkuro kogozoo i London
ko i konoruvo di Thames, ino bavang sid London,
nga a-insan varo pongitungan ko panarangan di Bengkoka ko Kudat om it
ongobinatang.



Ong varo pomogunan di moniim do pezo dit ulun sid gama
mongogorot dot iso o boros, iadko Indonesia
om Malaysia,
retanko suvai iseso o boros om iseso-ogi i kiroon om hoturan do pomogunan, ino
hal dino banal-noko a-nokonong. Iadko sid pomogunan do Swiss, varo apat bansa
do boros, nga kakali atag o demokrasi om hoturan om i gama miguguna-guna di
tanid o boros om tanid o bansa. Ko sid pomogunan do Kaling, varo 400 o boros,
nga banal-no varo iso o boros sid gama mihahatul-hatul om mihaharati, ino-no
Inggeris. Topot aso kiroon do porinta do Kaling do mananus dit ongoboros ko
mongogorot do bai Inggeris-po ot apakai.
Ino-no, ikid boros dot ongoulun, nga kiontok om mad
kiginavo di mongimbulai di kiroon om kosinango om kopudo di bansa dino sampai
polombus dit usul om kotungkusan di bansa dino antad di kodori-po. Ong tumanus
it iso o boros dino, mad tumanusi it iso kovosihan do Kinoringan di tinahakan
dau sid iso bansa om iso rurungan. I harati, momosikimi i riniba, ong matai it
iso o boros dot ulun, tu it ongoboros di riniba, nga tanda di kolunduo dit
antad sid Kinoringan bahagi di tasantanid-tanid o vaza do riniba masi om mopud.






Antad sidi Amai Forschner

Sender email address:trafor@online.de

Kumaa di Amai Forshcner,
Agazo ot gama ku monorima kasi tu it inovit nu sid tanga dot bansa Momogun. Bahagi ko yoku, it gama nu monorundakai dit bansa Momogun banal ko avasi om noponuan dot samod.

Sokoviai ino nokentalang sid sokoviai ot ulun Momogun.
Kounsapatan Tavasi om Immanuel.

joe byne Lumungking